Bann gran erer fer par bann gran dimoun
Bann gran dimoun otoproklame
Makiavel, azan, sosiokiltirel, gran gran koze
Oter latour efel
Zot plis orizontal ek zot plis vertikal
Parfwa vertikal ek orizontal tou-le-de
Ek enn tonn feray
San grander dam
San vre “concern” pou se ki pe atann sak zanfan moris pli divan
Sak zefor paret san rezilta
Sak rezilta dilie par zot mank konviksion, zot mank lonet-te
Zot kriye, anou vande, anou vande
Nou vote pou plis kas
Akot kapav may enn par enn
Kouma enn ti-pwason ki ape debat andeor dilo dan bout kann-a-pes
Bann lezot gran dimoun ki ena boukou lane lexistans lor zot parkour lavi
Zot tou ape bliye linportans viv dan enn leta laik
Akot relizion gagn drwa existe dan zot kotidien
Me san melanz ek zafer politik ki konsern tou dimoun ki viv lor sa ti-bout later la
Pou demin pa mor vilain kouma dan lafrik santral, kouma dan tou pei akot politik divize lor baz etnik ou relizion
Ki fini par eklat enn par enn avek zot laenn mons
zom masakre zom
Sakenn anvi montre li pli for
Alor ki tou pou ale enn zour
Zot bliye leritaz zot kite
Leritaz li pa zis materiel
Leritaz li Liberte
Leritaz li larmoni
Leritaz li dan respe ek dignite
Kouma bann zwazo ki anvole dan lesiel
Kouma bann zanfan ki fil zot servolan an ete ou an iver
Avek saler zetwal lizour
Akot relizion, etnicite, kominite napa sipoze melanz ek lezafer politik enn pei
Akot liberte apartenir a sak individi
A sak zanfan
San ki zot masakre zot kamarad, me pllis dan larmoni, dan lamour, dan respe
Mo pei, Nou pei, pe fer tris pou viv telman tou zafer ape kree plis konfizion dan latet dimoun
Pou koumanse avek nou bann dirizan
Kot zot finn dir dan enn sesion parlmanter ki reform bizin fer sinon pa pou gagn led ek bann pei depi en deor kan nou viol bann konvansion nou finn signe ek zot
Zot lanfaz an defazaz ek larealite
Nou realite kapav pli zoli si zot pans inpe plis progre, vre linite, ek larmoni, olie pans zis agrip ek pouvwar
Nou bann zanfan kapav rekoumans fil zot servolan ansam ou swa galoupe dan mem laplenn ki zot bann ti-kamarad san zizman, be twa ki twa, depar to nom, to fizionomi, swa to fason abiye
Zetwal lizour briye pou tou dimoun parey mem si demagozi napa paret pe fini
Facebook Comments